resepte

Moussaka
Genoeg vir 6 mense

EIERVRUGTE
4 eiervrugte, geskil en in 1cm skywe gesny
sout
125ml olie

MAALVLEIS
2 uie, in ringe gesny
olie
1kg maer maalvleis
50ml tamatie pasta
150ml wit wyn
125ml water
1ml neutmuskaat (nutmeg)
50ml fyn gekapte pietersielie
sout
peper

SOUS
50ml botter
50ml koekmeelblom
500ml melk
2 ekstra groot eiers, geklits
2ml neutmuskaat

2 - 3 groot tamaties, ontvel en in skywe gesny
50ml droe broodkrummels
50ml gerasperde cheddar kaas

Strooi sout oor die eiervrug en pak in 'n vergiettes.  Laat staan minstens 30 minute lank.  Spoel af onder water, druk droog met handdoekpapier.  Soteer die eiervrugskywe in olie tot sag en ligbruin.  Hou eenkant.

Voorverhit oond tot 180 C.  Smeer 26cm oondbak met botter.

Soteer die uie in olie in die pan tot sag.  Voeg die maalvleis bietjie vir bietjie by en braai tot ligbruin.  Meng die tamatiepasta, wit wyn en water en voeg by maalvleis.  Geur met neutmuskaat, pietersielie en sout en peper.  Verlaag hitte en prut tot die meeste vloeistof verdamp het.

Smelt die botter in 'n kastrol.  Voeg die meelblom by en meng tot 'n gladde pasta.  Voeg die melk stadig by, geur met sout en peper en meng goed.  Verhit, terwyl gedurig geroer word totdat die kook.   Verwyder van hitte en roer die eier en neutmuskaat by.

Pak helfte van eiervrug onderin die bak.  Vervolg met helfte van maalvleis.  Pak die tamatie skywe bo-op en skep die oorblywende maalvleis oor.  Pak nou ander helfte van eiervrug op en giet sous oor.  Meng die broodkrummels en die kaas en strooi oor.  Bak ongeveer 30 minute lank tot ligbruin van bo.

Hierdie moussaka is baie lekker maar ryk.

Indien iets oorbly vries ek dit baie suksesvol in foelie bakkies